शबनम न्यूज | प्रतिनिधी
बेकायदेशीरपणे पिस्तूल बाळगणाऱ्या एका व्यक्तीला सांगवी पोलिसांनी अटक केली. ही कारवाई शनिवारी (१७ जानेवारी) सकाळी दहाच्या सुमारास पिंपळे सौदागर येथील बस थांब्याजवळील मोकळ्या मैदानात करण्यात आली. पोलिसांना बेकायदेशीररित्या पिस्तुल बाळगणारा तरुण परिसरात येणार असल्याची माहिती मिळाली होती.
या प्रकरणात पोलिस अंमलदार आशिष बनकर यांनी सांगवी पोलिस ठाण्यात फिर्याद दिली आहे. पोलिसांनी भैरोबा अमोकसिद्ध दळवी (३२, चिखली) याला अटक केली आहे. पोलिसांनी दिलेल्या माहितीनुसार, संशयित पिंपळे सौदागर परिसरात संशयास्पदरित्या वावरत होता. याबाबत पोलिसांना माहिती मिळाली असता पोलिसांनी सापळा लावून त्याला ताब्यात घेतले. त्याची झडती घेतली असता त्याच्याकडे एक देशी बनावटीची पिस्तूल आणि एक जिवंत काडतूस विनापरवाना मिळून आले. याप्रकरणी अधिक तपास करण्यात येत आहे.
