लोकशाहीच्या रक्षणासाठी ८ ऑक्टोबरला ‘लोकशाही बचाव मार्च’

प्रतिनिधी : युनूस खतीब, पिंपरी-चिंचवड

 लोकशाही आणि संविधानाच्या सुरक्षेसह निवडणूक प्रक्रियेतील पारदर्शकतेच्या प्रश्नांकडे लक्ष वेधण्यासाठी पिंपरी-चिंचवड इंडिया आघाडी, सिव्हिल सोसायटी, पुरोगामी व विविध सामाजिक संघटनांच्या वतीने ‘लोकशाही बचाव मार्च’ काढण्यात येणार आहे. गुरुवारी (दि. ८) सकाळी ११ वाजता आकुर्डी गावातील विठ्ठल मंदिर येथून या मार्चला सुरुवात होऊन तो तहसीलदार कार्यालय, निगडी येथे समाप्त होणार आहे.

मतदार याद्यांमधील बदल, पात्र मतदारांच्या नावांबाबत निर्माण होणारे प्रश्न तसेच विशेष पुनर्परीक्षण अभियान (SIR) यामुळे नागरिकांमध्ये संभ्रम व चिंता निर्माण झाल्याचा दावा आयोजकांनी केला आहे. निवडणूक प्रक्रिया स्वतंत्र, निष्पक्ष आणि पारदर्शक असावी, अशी भूमिका घेत निवडणूक आयोगाच्या कारभाराबाबत उपस्थित झालेल्या प्रश्नांची स्वतंत्र व निष्पक्ष चौकशी करण्याची मागणी या मार्चद्वारे करण्यात येणार आहे.

आयोजकांच्या माहितीनुसार, पंतप्रधान नरेंद्र मोदी, केंद्रीय गृहमंत्री अमित शहा आणि मुख्य निवडणूक आयुक्त ज्ञानेश कुमार यांनी नैतिक जबाबदारी स्वीकारून राजीनामा द्यावा, तसेच मुख्य निवडणूक आयुक्त ज्ञानेश कुमार यांना पदावरून दूर करून कायद्यानुसार कारवाई करावी, अशी मागणी करण्यात येणार आहे.

तसेच मतदार यादी विशेष पुनर्परीक्षण अभियान (SIR) रद्द करावे, निवडणूक आयोगाचे कामकाज पारदर्शक, निष्पक्ष व स्वतंत्र पद्धतीने पूर्ववत करावे आणि मुख्य निवडणूक आयुक्त ज्ञानेश कुमार यांच्या कार्यकाळातील महत्त्वाच्या निर्णयांचे स्वतंत्र पुनर्परीक्षण करावे, या मागण्याही करण्यात येणार आहेत.

या मार्चमध्ये इंडिया आघाडीतील घटक पक्षांचे पदाधिकारी व कार्यकर्ते, सामाजिक कार्यकर्ते, सिव्हिल सोसायटीचे प्रतिनिधी, पुरोगामी संघटनांचे पदाधिकारी तसेच लोकशाहीप्रेमी नागरिकांनी सहभागी व्हावे, असे आवाहन आयोजकांनी केले आहे.