शबनम न्यूज
पिंपरी (प्रतिनिधी): पिंपरी चिंचवड महापालिकेच्या आगामी निवडणुकांसाठी महाराष्ट्र नवनिर्माण सेनेने आजपासून इच्छुक उमेदवारांच्या अर्जांची सोडत प्रक्रिया सुरू केली आहे. उत्साहवर्धक बाब म्हणजे सोडत सुरू झाल्याच्या अवघ्या एका तासात शहरातील विविध प्रभागांतून इच्छुकांनी तब्बल ५० अर्ज नेले.मनसेच्या फॉर्मसाठी उत्साह ओसंडून वाहत असल्याचे आजच्या सोडतीतून स्पष्ट झाले. पुढील काही दिवसांत हा आकडा आणखी वाढण्याची शक्यता वर्तवली जात आहे.
पिंपरी महापालिका निवडणुका जवळ येत असताना मनसेने शहरात बैठकींचा सपाटा लावला आहे. मनसे शहराध्यक्ष सचिन चिखले यांच्या नेतृत्वाखाली काल पिंपरी येथे झालेल्या महत्त्वपूर्ण बैठकीला पुणे शहराचे मनसे सरचिटणीस संजय भोसले आणि ऍड. उपेंद्र शेडगे तसेच मोठ्या संख्येने पदाधिकारी व कार्यकर्ते उपस्थित होते. बैठकीत उमेदवारी यादी, बी.एल.ओ., बी.एल.ए. नेमणूक, बूथ रचना आणि निवडणूक व्यवस्थापनावर सविस्तर चर्चा झाली. मनसे ही पिंपरी-चिंचवडमधील सामाजिक आणि नागरी प्रश्नांवर नेहमीच आक्रमक भूमिका घेणारी संघटना असून, परिश्रमाने उभी राहिलेली संघटना म्हणून तिची प्रतिमा अधिकच भक्कम झाली आहे.
दरम्यान, मनसे शहराध्यक्ष सचिन चिखले म्हणाले; शहरातील विकास, सामाजिक प्रश्न, पर्यावरण, आरोग्य आणि सांस्कृतिक क्षेत्रात योगदान देणाऱ्या व्यक्तींना राजकारणात संधी मिळावी यासाठी मनसे प्रयत्नशील आहे. विशेष म्हणजे, शहरातील विविध घटकांमध्ये समाजासाठी मोलाचे योगदान देणाऱ्या व्यक्ती, ऍडवोकेट, डॉक्टर, साहित्यिक, पत्रकार, कलाकार, निसर्गप्रेमी यांनीही मनसेकडून निवडणूक लढवावी, अशी अपेक्षा आहे. समाजातील अशा तळमळीच्या आणि कार्यशील व्यक्तींना अग्रस्थानी आणण्यावर मनसेचा भर आहे. मनसे प्रमुख राज साहेब ठाकरे यांच्या मार्गदर्शनाखाली तसेच शहरात केलेल्या कामांच्या बळावर मनसे आगामी महापालिका निवडणुकीला सज्ज आहे. जनतेच्या प्रश्नांसाठी लढणाऱ्या खऱ्या जनप्रतिनिधींना पुढे आणण्याचा आमचा संकल्प आहे.” मनसेचे अर्ज घेऊ इच्छिणाऱ्या सर्व इच्छुक उमेदवारांनी मनसे शहराध्यक्ष सचिन चिखले किंवा मनसे सचिव रुपेश पटेकर यांच्याशी संपर्क साधावा, असे आवाहन करण्यात आले आहे.
