शबनम न्यूज | प्रतिनिधी
तळेगाव दाभाडे येथे रस्त्यावर उभ्या असलेल्या तरुणांना वाहनाचा हॉर्न वाजवल्याचा जाब विचारण्याच्या कारणावरून एका महाविद्यालयीन विद्यार्थ्याला मारहाण करण्यात आल्याची घटना घडली आहे. या मारहाणीत विद्यार्थ्याच्या डोक्याला गंभीर दुखापत झाल्याचे पोलिसांच्या प्रसिद्धीपत्रकात नमूद आहे.
याप्रकरणी श्रेयस बजरंग पवार (वय २२, रा. गंगडे नगर, पिंपळे गुरव, पुणे) यांनी फिर्याद दिली आहे. १७ ऑक्टोबर २०२६ रोजी रात्री सुमारे ८.३० वाजता नूतन इंजिनिअरिंग कॉलेजसमोरील रस्त्यावर ही घटना घडल्याचे तक्रारीत नमूद आहे.
फिर्यादी हे नूतन इंजिनिअरिंग कॉलेजचे विद्यार्थी असून, ते कॉलेजमधून घरी जाण्यासाठी फोर व्हीलरने निघाले होते. कॉलेजसमोरील रस्त्यावर काही तरुणांचा घोळका उभा होता. त्यामुळे फिर्यादीने वाहनाचा हॉर्न वाजवून पुढे जाण्याचा प्रयत्न केला. त्यावेळी सुरुवातीला दोन तरुण फिर्यादीजवळ आले आणि ‘आम्ही गाववाले आहोत, तर आम्हाला हॉर्न का देता?’ असा जाब विचारत त्यांना गाडीतून बाहेर ओढल्याचा आरोप आहे.
त्यानंतर आणखी दोन तरुण तेथे आले. चारही जणांनी मिळून फिर्यादीला लाथाबुक्क्यांनी मारहाण केली. यावेळी त्यांच्यापैकी एकाने कठीण वस्तूने फिर्यादीच्या डोक्यावर वार केल्याने गंभीर दुखापत झाल्याचे तक्रारीत नमूद आहे.
या प्रकरणी तळेगाव दाभाडे पोलीस ठाण्यात भारतीय न्याय संहितेच्या कलम ११८(१), ११५(२), ३५१(२), ३५२ आणि ३(५) अंतर्गत गुन्हा दाखल करण्यात आला आहे. प्रसिद्धीपत्रकात आरोपींची नावे न देता चार अनोळखी तरुणांचा उल्लेख करण्यात आला आहे. त्यामुळे त्यांची नावे उपलब्ध नसल्याने या बातमीत नमूद करता येत नाहीत.
Total Users : 232128