शबनम न्यूज | प्रतिनिधी
विकासनगर, किवळे येथील दिव्यांग क्रिकेटपटू साजिद तांबोळी यांना दिव्यांग क्रिकेटमधील उत्कृष्ट गोलंदाजी, सातत्यपूर्ण कामगिरी, समर्पण आणि उल्लेखनीय योगदानाबद्दल प्रतिष्ठित ‘सर्वोत्कृष्ट गोलंदाज वर्ष २०२६ – दिव्यांग क्रिकेट’ या पुरस्काराने सन्मानित करण्यात आले. आग्रा येथील साहिब सिटी स्टार या हॉटेलमध्ये आयोजित दिव्यांग क्रिकेट परिषद भारत (डीसीसीबीआय) यांच्या दिव्यांग क्रिकेट पुरस्कार २०२६ सोहळ्यात त्यांना हा मानाचा पुरस्कार प्रदान करण्यात आला.
या पुरस्कार वितरण सोहळ्याला भारत सरकारच्या माजी परराष्ट्र राज्यमंत्री मीनाक्षी लेखी प्रमुख अतिथी म्हणून उपस्थित होत्या. त्यांच्या हस्ते साजिद तांबोळी यांना सन्मानचिन्ह, प्रशस्तीपत्र आणि पुरस्कार प्रदान करण्यात आला. यावेळी दिव्यांग क्रिकेट परिषद भारताचे संयुक्त अध्यक्ष डॉ. भगवान तलवारे, रेडियंट क्रीडा व्यवस्थापन कंपनीचे अध्यक्ष औशिम खेत्रपाल, तसेच अनेक मान्यवर उपस्थित होते.
कार्यक्रमाला पंजाब नॅशनल बँकेचे अधिकारी, दिव्यांग क्रिकेट परिषद भारताचे महासचिव हारून रशीद, अध्यक्ष मुकेश कंचन, मुख्य कार्यकारी अधिकारी खालिद अब्बास, मुख्य कार्यकारी अधिकारी गझल खान, तसेच विविध राज्यांतील दिव्यांग क्रिकेटपटू, प्रशिक्षक, क्रीडा अधिकारी आणि हितचिंतक मोठ्या संख्येने उपस्थित होते.
पुरस्कार स्वीकारल्यानंतर साजिद तांबोळी यांनी आपल्या यशामागे उभ्या असलेल्या दिव्यांग क्रिकेट परिषद भारत, प्रमुख अतिथी, उपस्थित मान्यवर, अधिकारी, प्रशिक्षक, संघातील सहकारी खेळाडू, समर्थक आणि मित्रपरिवाराचे मनःपूर्वक आभार मानले. हा सन्मान माझ्यासाठी अत्यंत अभिमानाचा आणि प्रेरणादायी क्षण असून, या पुरस्कारामुळे भारतातील दिव्यांग क्रिकेटच्या विकासासाठी आणि प्रसारासाठी अधिक जोमाने कार्य करण्याची प्रेरणा मिळाली असल्याची भावना त्यांनी व्यक्त केली.
साजिद तांबोळी यांच्या या यशामुळे विकासनगर, किवळे परिसरासह संपूर्ण पिंपरी-चिंचवड शहरात आनंदाचे वातावरण निर्माण झाले आहे. स्थानिक नागरिक, क्रीडाप्रेमी आणि विविध सामाजिक संस्थांकडून त्यांच्यावर अभिनंदनाचा वर्षाव होत आहे. त्यांच्या या यशाने दिव्यांग खेळाडूंसमोर नवे प्रेरणादायी उदाहरण उभे राहिले असून, हा पुरस्कार केवळ वैयक्तिक सन्मान नसून मेहनत, संघर्ष, समर्पण आणि जिद्दीची पावती असल्याचे मानले जात आहे.
