शबनम न्यूज | बारामती
भवानीनगर येथील श्री छत्रपती सहकारी साखर कारखान्याची २०२५-२६ ते २०३०-३१ कालावधीसाठी संचालकपदाची निवडणूक होत आहे. कोट्यवधींचे कर्ज असलेल्या या कारखान्याची यंदा राजकीय समीकरणे बदलल्याने इच्छुकांची मोठी भाऊगर्दी झाली आहे. या निवडणुकीच्या अनुषंगाने बारामती येथे गुरुवारी (दि. २४) नामनिर्दिष्ट सर्वपक्षीय उमेदवारांची मुलाखत, चर्चा गटनिहाय आयोजित केली आहे. यावेळी उपमुख्यमंत्री अजित पवार, कॅबिनेट मंत्री दत्तात्रय मामा भरणे उपस्थित राहणार आहेत. याबाबत निवडणूक समन्वयक किरण गुजर, सर्वपक्षीय पॅनल प्रमुख पृथ्वीराज जाचक यांनी माहिती दिली.
गुरुवारी सकाळी ९ ते दुपारी ३ या कालावधीत इच्छुकांच्या मुलाखती घेण्यात येणार आहेत. भवानीनगर येथे झालेल्या सर्वपक्षीय कार्यकर्ता सभेत उपमुख्यमंत्री पवार यांनी आदर्श संचालकपदाबाबतच्या त्यांच्या अपेक्षा व्यक्त केल्या आहेत. त्यामुळे कारखाना पूर्वपदावर आणण्यासाठी क्षमता असणाऱ्या संबंधित उमेदवारांनाच पवार संधी देणार आहेत. लोकसभा, विधानसभा निवडणुकीसह स्थानिक स्वराज्य निवडणुकांमध्ये वेगळे लोक निवडून गेल्यास विकासकामांवर परिणाम होतो. मात्र, दूध संघ, साखर कारखाना निवडणुकीत चुकीच्या लोकांना निवडून दिल्यास त्याची जबरदस्त किंमत मोजावी लागते. ज्यांचा राजकारणाचा संबंध नाही, अशा नवीन चेहऱ्यांना यंदा संधी देणार आहे, जे चांगले काम करतील. कारखान्यात ऊस वाहतुकीला ट्रॅक्टर असणाऱ्यांना अजिबात उमेदवारी अर्ज भरू नये. तसेच विविध पदे भूषविलेल्यांनी देखील अर्ज भरू नये. जनमानसात स्वच्छ प्रतिमा असणाऱ्यांनीच अर्ज करावेत, ज्याचा व्यवसाय, धंदा चांगला आहे, अशा लोकांना अर्ज भरायला सांगा, अशी अपेक्षा उपमुख्यमंत्री पवार यांनी निवडणूक लढणाऱ्या चेहऱ्याबद्दल व्यक्त केली आहे. पवार यांच्या अपेक्षेला खऱ्या ठरणाऱ्या इच्छुकांच्याच गळ्यात उमेदवारीची माळ पडणार आहे. यामध्ये मंत्री भरणे यांच्यासह जाचक यांची भूमिका देखील निर्णायक ठरणार आहे.
