शबनम न्यूज | प्रतिनिधी
नवी दिल्ली : देशभरातील विविध केंद्रीय विद्यापीठांमध्ये प्रवेशासाठी घेतली जाणारी ‘कॉमन युनिव्हर्सिटी एन्ट्रन्स टेस्ट’ अर्थात CUET (UG) 2026 परीक्षेबाबत राष्ट्रीय परीक्षा एजन्सी (NTA) ने महत्त्वाची घोषणा केली आहे. २८ मे २०२६ रोजी होणारी CUET (UG) परीक्षा अचानक स्थगित करण्यात आली असून, यामुळे लाखो विद्यार्थ्यांमध्ये संभ्रमाचे वातावरण निर्माण झाले आहे.
राष्ट्रीय परीक्षा एजन्सीने जारी केलेल्या अधिकृत प्रसिद्धीपत्रकानुसार, ईद-उल-अज्हा (बकरीद) या शासकीय सुट्टीत झालेल्या बदलामुळे २८ मे रोजी होणाऱ्या दोन्ही सत्रांतील (Shifts) परीक्षा पुढे ढकलण्यात आल्या आहेत. या दिवशी परीक्षा देणाऱ्या उमेदवारांसाठी सुधारित वेळापत्रक आणि नव्या तारखा लवकरच जाहीर करण्यात येणार असल्याचे NTA ने स्पष्ट केले आहे.
देशातील विविध विद्यापीठांमध्ये पदवी अभ्यासक्रमांसाठी प्रवेश मिळवण्यासाठी CUET ही अत्यंत महत्त्वाची परीक्षा मानली जाते. त्यामुळे परीक्षेच्या वेळापत्रकातील अचानक झालेल्या बदलामुळे विद्यार्थी आणि पालकांमध्ये चिंता व्यक्त केली जात आहे. दरम्यान, विद्यार्थ्यांनी अधिकृत वेबसाइटवर लक्ष ठेवावे आणि अफवांवर विश्वास ठेवू नये, असे आवाहनही NTA कडून करण्यात आले आहे.
