ड्रायव्हर डे उत्साहात साजरा; सुरक्षित वाहनचालना आणि वाहतूक शिस्तीचा संदेश

वाहनचालकांच्या योगदानाचा सन्मान करण्याबरोबरच सुरक्षित आणि शिस्तबद्ध वाहनचालनेचा संदेश देण्यासाठी ड्रायव्हर डे उत्साहात साजरा करण्यात आला. या कार्यक्रमात वेदांत मोटर ड्रायव्हिंग स्कूल, समीर मोटर ड्रायव्हिंग स्कूल आणि प्रादेशिक परिवहन विभाग (RTO) यांचा सहभाग होता.

यावेळी वाहनचालकांना सुरक्षित वाहनचालना, वाहतूक नियमांचे काटेकोर पालन, अतिवेग टाळणे, वाहन चालविताना मोबाईलचा वापर न करणे तसेच रस्त्यावरील इतर वाहनचालक आणि पादचाऱ्यांच्या सुरक्षिततेची काळजी घेण्याबाबत मार्गदर्शन करण्यात आले.

मोटार वाहन निरीक्षक अभिजीत कांडगे, मोटार वाहन निरीक्षक अभिजीत तरकसे आणि सहायक मोटार वाहन निरीक्षक शिवदीनी लाड यांनी उपस्थित वाहनचालकांना मार्गदर्शन केले. विशेषतः वाहनांची दैनंदिन देखभाल करणे, सुरक्षितपणे वाहन चालविणे, अतिवेग टाळणे, प्रवाशांच्या सुरक्षिततेची काळजी घेणे आणि अपघातांचे प्रमाण कमी करण्यासाठी आवश्यक ती खबरदारी घेण्याचे आवाहन करण्यात आले.

अभिजीत कांडगे यांनी उपस्थित ड्रायव्हर बंधूंना मार्गदर्शन करताना वाहन चालविताना नियमांचे पालन आणि संयमाचे महत्त्व अधोरेखित केले. वाहनचालक हे वाहतूक व्यवस्थेतील अत्यंत महत्त्वाचे घटक असून, त्यांची जबाबदार आणि शिस्तबद्ध वाहनचालना रस्ते अपघातांचे प्रमाण कमी करण्यासाठी महत्त्वाची ठरू शकते, असा संदेश यावेळी देण्यात आला.

ड्रायव्हर डेच्या निमित्ताने वाहनचालकांचा सन्मान करण्यात आला. ‘सुरक्षित चालक – सुरक्षित प्रवास – सुरक्षित समाज’ हा संदेश देत सुरक्षित वाहनचालनेबाबत जनजागृती करण्यात आली.

या कार्यक्रमास पीएमपीएमएल डेपो मॅनेजर प्रताप चव्हाण, राष्ट्रवादी काँग्रेस वाहतूक सेल पिंपरी-चिंचवड शहराध्यक्ष विनोद वरखडे, अकबर शेख, तहल मातव यांच्यासह विविध पदाधिकारी आणि वाहनचालक उपस्थित होते.