शबनम न्यूज | प्रतिनिधी
मोशी कचरा डेपो परिसरात घडलेल्या भीषण दुर्घटनेनंतर पिंपरी-चिंचवड महापालिकेच्या पर्यावरण विभागाच्या कामकाजावर गंभीर प्रश्न उपस्थित होत आहेत. या पार्श्वभूमीवर शिवसेना नगरसेविका सुलभा उबाळे यांनी पर्यावरण विभागाची संपूर्ण चौकशी करून दोषींवर कठोर कारवाई करण्याची मागणी केली आहे. त्यांनी मुख्यमंत्री
देवेंद्र फडणवीस यांच्याकडे निवेदन देत या प्रकरणात तातडीने हस्तक्षेप करण्याची विनंती केली आहे.
कचऱ्याचा ढिगारा इमारतीवर कोसळला
मोशी येथील कचरा डेपोमध्ये मोठ्या प्रमाणात साचलेला कचऱ्याचा ढिगारा अचानक कोसळून शेजारील इमारतीवर आदळला. या दुर्घटनेत अनेक कामगार ढिगाऱ्याखाली अडकले असून काहींचा मृत्यू झाल्याची माहिती समोर आली आहे. घटनेनंतर एनडीआरएफ, अग्निशमन दल, पोलीस आणि महापालिकेची बचाव पथके युद्धपातळीवर कार्यरत आहेत.
दुर्घटनेमुळे परिसरात भीतीचे वातावरण निर्माण झाले असून नागरिकांमध्ये तीव्र संताप व्यक्त केला जात आहे. स्थानिक नागरिकांनी वारंवार वाढत्या कचरा ढिगाऱ्याबाबत तक्रारी केल्या होत्या, मात्र प्रशासनाने त्याकडे दुर्लक्ष केल्याचा आरोप होत आहे.
जबाबदार अधिकाऱ्यांना निलंबित करा
सुलभा उबाळे यांनी आपल्या निवेदनात म्हटले आहे की, या दुर्घटनेला जबाबदार असलेल्या अधिकाऱ्यांना तात्काळ निलंबित करण्यात यावे. पर्यावरण विभागाच्या निष्काळजीपणामुळेच ही परिस्थिती निर्माण झाल्याचा त्यांचा आरोप आहे.
“मोशीतील दुर्घटना ही केवळ अपघात नसून प्रशासनाच्या अक्षम्य दुर्लक्षाचे परिणाम आहेत. जबाबदार अधिकाऱ्यांवर तात्काळ कारवाई करून पर्यावरण विभागाची संपूर्ण चौकशी करण्यात यावी,”
असे सुलभा उबाळे यांनी म्हटले आहे.
वेस्ट टू एनर्जी प्रकल्पावरही सवाल
उबाळे यांनी मोशीतील वेस्ट टू एनर्जी प्रकल्प दीर्घकाळ बंद असल्याचा मुद्दा उपस्थित केला आहे. प्रकल्प कार्यरत नसल्यामुळे कचऱ्याचे प्रचंड ढिगारे साचत असल्याचा आरोप त्यांनी केला. तसेच कचरा व्यवस्थापनासाठी करण्यात आलेल्या बायोमायनिंग प्रक्रियेच्या कोट्यवधी रुपयांच्या निविदांबाबतही त्यांनी संशय व्यक्त केला आहे.
या निविदांमध्ये अनियमितता आणि भ्रष्टाचार झाल्याच्या आरोपांची सखोल चौकशी करून संबंधितांवर कठोर कारवाई करावी, अशी मागणी त्यांनी केली आहे.
पर्यावरण विभागाच्या कार्यपद्धतीवर प्रश्न
दुर्घटनेनंतर महापालिकेच्या पर्यावरण विभागाच्या कार्यपद्धतीवर मोठे प्रश्नचिन्ह निर्माण झाले आहे. कचऱ्याचे वैज्ञानिक व्यवस्थापन, सुरक्षित साठवणूक आणि नियमित निरीक्षण यामध्ये गंभीर त्रुटी असल्याचे आरोप होत आहेत.
स्थानिक नागरिकांच्या मते, कचऱ्याचा वाढता डोंगर आणि दुर्गंधीची समस्या अनेक महिन्यांपासून कायम होती. मात्र योग्य वेळी उपाययोजना न झाल्याने अखेर ही भीषण दुर्घटना घडली.
राजकीय वातावरण तापले
मोशी दुर्घटनेच्या मुद्द्यावरून शहरातील राजकीय वातावरणही तापले आहे. विरोधी पक्षांकडून प्रशासनावर निष्काळजीपणाचा आरोप केला जात असून जबाबदारी निश्चित करण्याची मागणी जोर धरत आहे. शिवसेनेनंतर इतर पक्षांचे नेतेही या प्रकरणात चौकशीची मागणी करण्याची शक्यता व्यक्त केली जात आहे.
