शबनम न्यूज | प्रतिनिधी
छत्रपती शिवाजी महाराजांच्या महान कार्याचा व व्यापक विचारांचा प्रचार, प्रसार करण्यासाठी दरवर्षीप्रमाणे पिंपरी चिंचवड महानगरपालिकेच्या वतीने १५ ते १९ फेब्रुवारी २०२६ या कालावधीत शहरात विविध ठिकाणी ‘छत्रपती शिवाजी महाराज विचार प्रबोधन पर्व २०२६’ या कार्यक्रमाचे आयोजन करण्यात आले असल्याची माहिती महापौर रवि लांडगे यांनी दिली आहे.
या प्रबोधन पर्वात ‘शिवगर्जना’ या भव्य महानाट्यासह ‘शिवशंभो गर्जना’, ‘शाहीरी कार्यक्रम’, ‘यशाचा नवा मंत्र – शिवमंत्र’, विविध विषयांवर व्याख्याने, ‘छत्रपती शिवाजी महाराज व त्यांच्या जीवनावर आधारित शाहिरी पोवाडे’ यांसह शालेय विद्यार्थ्यांच्या छत्रपती शिवाजी महाराज यांचे जीवनावर आधारित निबंध, चित्रकला आणि वक्तृत्व स्पर्धा,रक्तदान शिबीर अशा विविध कार्यक्रमांचे आयोजन करण्यात आलेले आहे.
पिंपरी चिंचवड महानगरपालिका दरवर्षी छत्रपती शिवाजी महाराज विचार प्रबोधनपर्व साजरे करीत असते. यानिमित्त यंदाही महापालिकेच्या वतीने विचार प्रबोधन पर्वाचे आयोजन करण्यात आलेले असून या कार्यक्रमाचे उद्घाटन शनिवार १५ फेब्रुवारी रोजी सायंकाळी ६ वाजता महापौर रवि लांडगे यांचे हस्ते निगडी येथील भक्ती शक्ती समूह शिल्प उद्यान येथे होणार असून अनेक मान्यवर या उद्घाटनास उपस्थित राहणार आहेत.
या कार्यक्रमास केंद्रीय सहकार व नागरी विमान वाहतूक राज्यमंत्री मुरलीधर मोहोळ, राज्याच्या उपमुख्यमंत्री तथा पुणे जिल्ह्याच्या पालकमंत्री सुनेत्रा पवार यांची विशेष उपस्थिती असणार आहे. तसेच राज्याचे उच्च व तंत्रशिक्षण मंत्री चंद्रकांत पाटील, कृषी मंत्री दत्तात्रय भरणे, विधानसभा उपाध्यक्ष अण्णा बनसोडे, विधानपरिषदेच्या उपसभापती नीलम गोऱ्हे, नगरविकास राज्यमंत्री माधुरी मिसाळ यांची प्रमूख उपस्थिती तसेच खासदार मेधा कुलकर्णी,सुप्रिया सुळे, श्रीरंग बारणे, डॉ.अमोल कोल्हे, आमदार उमा खापरे, अमित गोरखे, महेश लांडगे, शंकर जगताप, शंकर मांडेकर, सत्तारूढ पक्षनेते प्रशांत शितोळे, विरोधी पक्षनेते भाऊसाहेब भोईर, उपमहापौर शर्मिला बाबर, महाराष्ट्र राज्य अनुसूचित जाती जमाती आयोग सदस्य ॲड.गोरक्ष लोखंडे, शहरातील नगरसदस्य, नगरसदस्या तसेच महानगरपालिकेचे अतिरिक्त आयुक्त विजयकुमार खोराटे, तृप्ती सांडभोर, विक्रांत बगाडे यांची देखील उपस्थिती लाभणार आहे. याशिवाय भक्ती शक्ती शिवजयंती उत्सव समितीचे पदाधिकारी, कार्यकर्ते, ज्येष्ठ नागरिक, शिवप्रेमी, सामाजिक कार्यकर्ते तसेच मान्यवर उपस्थित राहणार आहेत.
भक्ती शक्ती चौक निगडी येथील कार्यक्रम…
१५ फेब्रुवारी रोजी निगडी येथील भक्ती-शक्ती समूह शिल्प उद्यान येथे ६ वाजता उद्घाटनाचा कार्यक्रम होणार असून संध्याकाळी ७ वाजता अंबेजोगाई येथील सुप्रसिद्ध कलाकार अभिजीत जाधव आणि आमु जाधव हे विविध वाद्यांमधून ‘शिवशंभो गर्जना’ हा कार्यक्रम सादर करणार आहेत,तर १६ फेब्रुवारी रोजी संध्याकाळी ७ वाजता शाहीर प्रकाश ढवळे तसेच शाहीर अशोक कामथे, बाळासाहेब मालुसकर, चैतन्य काजुळकर, जालिंदर शिंदे, लीना देशपांडे, वनिता मोहिते, कांचन जोशी, प्रचिती विष्णूरकर, स्मिता बांदिवडेकर, चित्रा कुलकर्णी, उज्वला जाधव, राजरत्न पांडगळे, शाहीर घनशाम कुदळे हे छत्रपती शिवाजी महाराज यांना शाहिरीच्या माध्यमातून मानवंदना देणार आहेत.
संभाजीनगर, चिंचवड येथील कार्यक्रम…
१७ फेब्रुवारी रोजी संध्याकाळी ७ वाजता डॉ. विजय तनपुरे हे ‘यशाचा नवा मंत्र – शिवतंत्र’ हा शाहिरी कार्यक्रम सादर करणार आहेत. १८ फेब्रुवारी रोजी संध्याकाळी ७ वाजता सुप्रसिद्ध व्याख्याते नितीन बानगुडे पाटील यांचे ‘छत्रपती शिवाजी महाराज यांचा राज्याभिषेक’ या विषयावरील व्याख्यान आयोजित करण्यात आले आहे. त्यानंतर १९ फेब्रुवारी रोजी व्याख्याते अविनाश भारती हे ‘आदर्श राजे – छत्रपती शिवाजी महाराज’ या विषयावर मार्गदर्शन करणार आहेत.कमलनयन बजाज शाळेजवळ हा कार्यक्रम होणार आहे.
एच. ए. कॉलनी, पिंपरी येथील व्याख्यान…
१९ फेब्रुवारी रोजी एच. ए. कॉलनी, नेहरूनगर येथे संध्याकाळी ७ वाजता ‘छत्रपती शिवाजी महाराज – एक आदर्श राजे’ या विषयावरील व्याख्यानाचे आयोजन करण्यात आले आहे. या कार्यक्रमात भारत इतिहास संशोधन मंडळाचे सदस्य बालाजी काशिद आणि दस्तगीर काझी व्याख्यान सादर करणार आहेत.
डांगे चौक, चिंचवड येथील कार्यक्रमांचा तपशील…
डांगे चौक, थेरगाव येथे १७ फेब्रुवारी रोजी शाहीर सुरेश सुर्यवंशी आसंगीकर व सहकारी संध्याकाळी ७ वाजता छत्रपती शिवाजी महाराज यांच्या जीवनावर आधारित पोवाडा सादर करणार आहेत. त्यानंतर १८ फेब्रुवारी रोजी संध्याकाळी ७ वाजता व्याख्याते भरत रखमाजी पांगारे यांच्या ‘छत्रपती शिवाजी महाराज म्हणजे मूर्तीमंत जीवनविद्या’ या विषयावरील व्याख्यानाचे आयोजन करण्यात आले आहे. तर १९ फेब्रुवारी रोजी शिवशाहीर डाॅ.विजय महाराज तनपुरे यांचा ‘यशाचा नवा मंत्र – शिवतंत्र’ हा शाहिरी कार्यक्रम सादर होणार आहे.
सदरचे कार्यक्रम सर्व नागरिकांसाठी खुले व विनामूल्य असून शहरातील नागरिकांनी या कार्यक्रमास उपस्थित रहावे असे आवाहन महापौर रवि लांडगे यांनी केले आहे.
