मतदारांशी थेट संवादातून विश्वास दृढ
शबनम न्यूज | प्रतिनिधी
पिंपरी चिंचवड महानगरपालिका निवडणुकीच्या पार्श्वभूमीवर प्रभाग क्रमांक ५ मध्ये राष्ट्रवादी काँग्रेसच्या अधिकृत उमेदवार प्रियांकाताई बारसे यांच्या प्रचाराला चांगली गती मिळत असून, त्यांच्या कोपरा सभेला मतदारांकडून उत्स्फूर्त प्रतिसाद मिळाल्याचे चित्र दिसून आले. स्थानिक नागरिक, महिला, युवक व ज्येष्ठ नागरिक मोठ्या संख्येने या कोपरा सभेला उपस्थित राहिले होते.
या कोपरा सभेत प्रियांकाताई बारसे यांनी उपस्थित मतदारांना संबोधित करताना राष्ट्रवादी काँग्रेसच्या विकासाभिमुख धोरणांची माहिती दिली. प्रभाग क्रमांक ५ च्या सर्वांगीण विकासासाठी आपण कटिबद्ध असल्याचे त्यांनी ठामपणे सांगितले. पाणीपुरवठा, अंतर्गत रस्ते, ड्रेनेज व्यवस्था, कचरा व्यवस्थापन, स्वच्छता, आरोग्य सुविधा, महिलांची सुरक्षितता, ज्येष्ठ नागरिकांसाठी सुविधा, तसेच युवकांसाठी क्रीडा व रोजगाराच्या संधी निर्माण करण्यावर विशेष भर देण्यात येईल, अशी ग्वाही त्यांनी दिली.

यावेळी येत्या १५ तारखेला होणाऱ्या मतदानाबाबत प्रियांकाताई बारसे यांनी मतदारांना सविस्तर मार्गदर्शन केले. मतदान केंद्रावर कसे जायचे, मतदान यंत्राचा वापर कसा करायचा, आपला मताधिकार योग्य पद्धतीने कसा बजावायचा, याबाबत त्यांनी सोप्या शब्दांत माहिती दिली. विशेषतः प्रथमच मतदान करणाऱ्या मतदारांसाठी हे मार्गदर्शन उपयुक्त ठरले.
कोपरा सभा संपल्यानंतर प्रियांका ताई बारसे यांनी प्रभागातील विविध वस्ती व घरांमध्ये भेटी देत घरोघरी मतदारांशी थेट संवाद साधला. या भेटीदरम्यान नागरिकांच्या समस्या, अडचणी आणि अपेक्षा जाणून घेतल्या. पाणीपुरवठ्याची अडचण, रस्त्यांची अवस्था, ड्रेनेज, कचरा संकलन, स्ट्रीट लाईट, तसेच महिलांशी संबंधित प्रश्न नागरिकांनी मांडले. या सर्व समस्यांची नोंद घेत, निवडणुकीनंतर प्राधान्याने उपाययोजना करण्याची ग्वाही त्यांनी दिली.
प्रियांकाताई बारसे या सर्वसामान्य कुटुंबातून पुढे आलेल्या, लोकांच्या प्रश्नांशी थेट जोडलेल्या आणि सतत संपर्कात राहणाऱ्या उमेदवार असल्याचे मत अनेक मतदारांनी यावेळी व्यक्त केले. त्यांच्या साध्या स्वभावामुळे आणि लोकाभिमुख भूमिकेमुळे प्रभागातील महिला व युवकांमध्ये त्यांना विशेष पाठिंबा मिळत असल्याचे दिसून येत आहे.
एकूणच प्रभाग क्रमांक ५ मध्ये राष्ट्रवादी काँग्रेसच्या प्रियांकाताई बारसे यांच्या कोपरा सभेला मिळालेला उत्स्फूर्त प्रतिसाद, घरोघरी संपर्क आणि मतदानाबाबत केलेले मार्गदर्शन पाहता, आगामी निवडणुकीत त्यांच्या प्रचाराला अधिक बळ मिळाल्याचे स्पष्टपणे जाणवत आहे.




Total Users : 240181