शबनम न्यूज | प्रतिनिधी
आगामी महापालिका निवडणूक शिवसेना पूर्ण ताकदीनिशी लढणार आहे. त्यासाठी प्रभागनिहाय बैठका सुरू आहेत. निवडणुकीत महिला, युवकांनाही संधी दिली जाणार आहे. महापालिका निवडणुकीसाठी शिवसेना सज्ज असल्याचे शिवसेनेचे उपनेते, खासदार श्रीरंग बारणे यांनी सांगितले. तसेच कार्यकर्त्यांनी राज्य सरकारचे निर्णय जनतेपर्यंत पोहोचविण्याचे आवाहनही त्यांनी केले.
पिंपरी-चिंचवड महापालिकेच्या आगामी निवडणुकांच्या पार्श्वभूमीवर आज (शुक्रवारी) शहरातील शिवसेना पदाधिकाऱ्यांची बैठक खासदार बारणे यांच्या अध्यक्षतेखाली पार पडली. पक्ष संघटनांच्या मजबुतीसह सदस्य नोंदणी मोहिमेचा आढावा घेण्यात आला. संघटनात्मक रणनीती आणि स्थानिक पातळीवरील निवडणूक तयारी या दोन्ही विषयांवर सखोल चर्चा झाली. महिला उपनेत्या सुलभा उबाळे ,पश्चिम महाराष्ट्र युवा सेना सचिव विश्वजीत बारणे, जिल्हाप्रमुख बाळासाहेब वाल्हेकर, शहरप्रमुख निलेश तरस, शहर संघटीका सरिता साने, महिला समन्वयक शिला भोंडवे, लोकसभा प्रमुख राजेंद्र तरस, अजिंक्य उबाळे, उपजिल्हा प्रमुख राजेश वाबळे, दिलीप पांढारकर, जिल्हा युवा सेना प्रमुख सागर पाचरणे, युवती जिल्हा प्रमुख सायली साळवी, शहर युवती प्रमुख रितू कांबळे, चिंचवड विधानसभा प्रमुख संतोष गुलाब बारणे, पिंपरी विधानसभा प्रमुख निखिल येवले, चिंचवड विधानसभा महिला प्रमुख शारदा वाघमोडे आणि पिंपरी विधानसभा महिला प्रमुख शैला निकम यांच्यासह अनेक पदाधिकारी मोठ्या संख्येने उपस्थित होते.
खासदार बारणे म्हणाले, सदस्य नोंदणीच्या कामाला गती द्यावी. घरोघरी जाऊन नोंदणी करावी. सक्रिय कार्यकर्ते वाढवावेत. पक्ष बांधणी मजबूत करावी. उपमुख्यमंत्री एकनाथ शिंदे यांच्या कामावर, नेतृत्वावर विश्वास ठेवून अनेक पक्षातील कार्यकर्ते पक्षात येत आहेत. त्यामुळे संघटना बळकट होण्यास मदत होत आहे. महापालिका निवडणुकीला पूर्ण ताकदीनिशी सामोरे जायचे आहे. एकनाथ शिंदे मुख्यमंत्री असताना घेतलेले लोकोपयोगी निर्णय जनतेपर्यंत पोहोचवावेत. आता महायुती सरकारच्या माध्यमातून घेतले जाणारे निर्णय तळागाळातील नागरिकांपर्यंत पोहोचवावेत. शासकीय योजनांचा लाभ लोकांना मिळवून द्यावा. प्रशासकीय राजवटीतील गलथान कारभार,चुकीचे निर्णय जनतेला सांगावेत. शिस्तबद्ध संघटन रचना आणि सर्व पदाधिकाऱ्यांचे एकसंघ योगदान हे आगामी निवडणुकीत विजयाची पायाभरणी ठरेल, असा विश्वासही त्यांनी व्यक्त केला.
