‘प्रहार: द अनटोल्ड स्टोरी ऑफ उज्ज्वल निकम’ चित्रपटाच्या पुण्यातील प्रमोशनला प्रेक्षकांचा उदंड प्रतिसाद

शबनम न्यूज | प्रतिनिधी

प्रख्यात सरकारी वकील पद्मश्री ॲड. उज्ज्वल निकम यांच्या रोमहर्षक जीवनप्रवासावर आधारित बहुचर्चित ‘प्रहार: द अनटोल्ड स्टोरी ऑफ उज्ज्वल निकम’ या चित्रपटाच्या प्रमोशननिमित्त चित्रपटाची टीम नुकतीच पुण्यात दाखल झाली होती. सांस्कृतिक राजधानी असलेल्या पुण्यातील रसिकांनी या टीमचे अत्यंत उत्साहात आणि जल्लोषात स्वागत केले. या प्रमोशन सोहळ्याला मुख्य अभिनेता राजकुमार राव, मुख्य अभिनेत्री वामिका गब्बी यांच्यासह स्वतः ज्येष्ठ विधिज्ञ ॲड. उज्ज्वल निकम यांची विशेष उपस्थिती लाभली होती.

पुण्यात झालेल्या या कार्यक्रमाला प्रेक्षकांची तुफान गर्दी उसळली होती. चाहत्यांनी आणि उपस्थितांनी दिलेल्या उत्स्फूर्त प्रतिसादाने संपूर्ण वातावरण भारावून गेले होते. उपस्थित मान्यवर आणि रसिकांनी चित्रपटाच्या संपूर्ण टीमवर कौतुकाचा वर्षाव करत चित्रपटाला भरभरून शुभेच्छा दिल्या. चित्रपटाची कथा, न्यायव्यवस्थेतील आव्हाने आणि न्यायालयीन लढा मोठ्या पडद्यावर पाहण्यासाठी प्रेक्षकांमध्ये प्रचंड उत्सुकता पाहायला मिळाली.

कार्यक्रमादरम्यान मुख्य अभिनेता राजकुमार राव याने आपल्या भावना व्यक्त करताना सांगितले की, “ॲडव्होकेट उज्ज्वल निकम यांच्यासारख्या महान व्यक्तिमत्त्वाचा बायोपिक करायला मिळणे ही माझ्यासाठी अत्यंत मोठी आणि अभिमानास्पद बाब आहे. त्यांच्या कारकिर्दीचा पट अत्यंत विस्तीर्ण आणि आव्हानात्मक आहे. ही भूमिका पडद्यावर जिवंत करताना केवळ त्यांची नक्कल न करता, त्यांच्या व्यक्तिमत्त्वातील बारकावे आत्मसात करून ती भूमिका प्रामाणिकपणे जगण्याचा मी पूर्ण प्रयत्न केला आहे. हा चित्रपट माझ्या संपूर्ण कारकिर्दीतील एक मैलाचा दगड ठरेल.”

कार्यक्रमात उपस्थित ज्येष्ठ विधिज्ञ ॲड. उज्ज्वल निकम यांनी राजकुमार राव आणि संपूर्ण चित्रपटाच्या टीमचे मनमोकळे कौतुक केले. ते म्हणाले, “खरं सांगायचं तर मला राजकुमार राव यांच्या आधीच्या कामाबद्दल फारशी माहिती नव्हती. मात्र ट्रेलर आणि चित्रपट पाहिल्यानंतर त्याने ही भूमिका अत्यंत चोख आणि ताकदीने निभावली आहे याची मला पूर्ण खात्री पटली. सर्वात महत्त्वाची गोष्ट म्हणजे त्याने माझी केवळ नक्कल (कॉपी) केलेली नाही; तर मी कसा आहे, माझे विचार, माझी देहबोली आणि न्यायालयात लढण्याची माझी पद्धत मुळापासून समजून घेऊन ती पडद्यावर उभी केली आहे. त्याचे हे काम खरोखरच वाखाणण्याजोगे आहे.”

पुण्यातील प्रमोशन सोहळा दणक्यात पार पडल्यानंतर या चित्रपटाबद्दलची उत्सुकता अधिकच ताणली गेली असून, चित्रपटाची संपूर्ण टीम या प्रतिसादाने भारावून गेली आहे.