शबनम न्यूज | प्रतिनिधी
मुंबई-सातारा महामार्गावरील वाकड ब्रिजजवळील सूर्य अंडरपास परिसरात ट्रक आणि पोलो वाहनाची जोरदार धडक होऊन भीषण अपघात झाला. या अपघातात पोलोमधील २१ वर्षीय तरुणाचा मृत्यू झाला, तर अन्य एक जण गंभीर जखमी झाला. महामार्गावर ट्रक धोकादायक पद्धतीने उभा केल्याचा आरोप असून, याप्रकरणी हिंजवडी पोलीस ठाण्यात ट्रकचालकाविरुद्ध गुन्हा दाखल करण्यात आला आहे.
हसन बाबालाल मुलाणी (वय ५८) असे गुन्हा दाखल झालेल्या ट्रकचालकाचे नाव आहे. याप्रकरणी पोलिसांकडून पुढील तपास सुरू आहे.
पोलिसांच्या नोंदीनुसार, २० सप्टेंबर रोजी पहाटे तीनच्या सुमारास वाकड ब्रिजजवळील सूर्य अंडरपास परिसरात हा अपघात झाला. मुंबई-सातारा महामार्गावर ट्रक धोकादायक पद्धतीने उभा करण्यात आला होता. याचदरम्यान त्या मार्गावरून पोलो वाहन जात असताना त्याची उभ्या असलेल्या ट्रकला जोरदार धडक झाली.
धडक इतकी भीषण होती की, पोलो वाहनाचे मोठे नुकसान झाले. या अपघातात पोलोमधील पियुष संजय रसाळ (वय २१, रा. पिंगळेवस्ती, मुंढवा) याच्या गळ्याला गंभीर दुखापत झाली. त्याला उपचारासाठी रुग्णालयात दाखल करण्यात आले; मात्र गंभीर दुखापतीमुळे त्याचा मृत्यू झाला.
या अपघातात मुकेश सुनील साळुंखे (वय २५) हादेखील जखमी झाला आहे. त्याच्यावर रुग्णालयात उपचार सुरू असल्याची माहिती आहे.
महामार्गावर वाहन उभे करताना आवश्यक ती खबरदारी न घेतल्याने आणि धोकादायक पद्धतीने ट्रक उभा केल्यामुळे हा अपघात घडल्याचा आरोप तक्रारीत करण्यात आला आहे. अपघाताची माहिती मिळताच संबंधित यंत्रणांनी घटनास्थळी धाव घेतली. अपघातामुळे काही काळ परिसरात वाहतुकीवर परिणाम झाला.
या प्रकरणी हिंजवडी पोलीस ठाण्यात हसन बाबालाल मुलाणी यांच्याविरुद्ध गुन्हा दाखल करण्यात आला असून, अपघात नेमका कशामुळे घडला, ट्रक कोणत्या परिस्थितीत आणि कोणत्या कारणासाठी महामार्गावर उभा करण्यात आला होता, याबाबत पोलीस अधिक तपास करीत आहेत.
Total Users : 224822