शबनम न्यूज | प्रतिनिधी
पिंपरी-चिंचवड पोलीस आयुक्तालयाच्या हद्दीत वाढत्या वाहन चोरीच्या पार्श्वभूमीवर देहूरोड पोलिसांनी प्रभावी कारवाई करत मोटारसायकल चोरी करणाऱ्या टोळीला जेरबंद केले आहे. या कारवाईत तीन आरोपींना अटक करण्यात आली असून एकूण ६ गुन्हे उघडकीस आले आहेत.
दिनांक २७ जानेवारी २०२६ रोजी देहूगाव परिसरात पेट्रोलिंगदरम्यान बिगर नंबर प्लेटच्या मोटारसायकलवरून संशयास्पद हालचाल करणाऱ्या ईश्वर संदीप गजे (वय २२) याला ताब्यात घेण्यात आले. चौकशीत त्याने मोटारसायकल चोरी केल्याची कबुली दिली. त्यानंतर त्याच्याकडून मिळालेल्या माहितीनुसार अनिकेत उर्फ छोट्या संतोष विटकर आणि आर्यन उर्फ एस.पी. आनंदा राऊत या दोघांना अटक करण्यात आली.
आरोपींकडून सुमारे ५ लाख रुपये किमतीच्या ६ मोटारसायकली व १ ऑटो रिक्षा जप्त करण्यात आल्या आहेत. देहूरोड, दिघी, सिंहगड रोड आणि खडक पोलीस ठाण्यांतील एकूण ६ वाहन चोरीचे गुन्हे उघडकीस आले असून पुढील तपास सुरू आहे.
ही कारवाई मा. पोलीस आयुक्त विनयकुमार चौबे यांच्या मार्गदर्शनाखाली देहूरोड पोलीस तपास पथकाने केली आहे.
