शबनम न्यूज | प्रतिनिधी
पिंपरी-चिंचवड शहरात शनिवारी दुपारपासून सुरू झालेल्या जोरदार वादळी वाऱ्यांमुळे अनेक ठिकाणी धोकादायक परिस्थिती निर्माण झाली. त्यातच निगडी परिसरात सुरू असलेल्या मेट्रो कामादरम्यान उंचावरील पत्र्याच्या छताचा मोठा भाग अचानक तुटून थेट बीआरटी मार्गात कोसळल्याची घटना घडली. सुदैवाने या दुर्घटनेत कोणतीही जीवितहानी झाली नाही आणि नागरिक थोडक्यात बचावले.
मिळालेल्या माहितीनुसार, दुपारनंतर शहरात अचानक वादळी वारे वाहू लागले. त्याचवेळी निगडीतील मेट्रो प्रकल्पाच्या कामासाठी उभारण्यात आलेल्या संरचनेवरील पत्र्याचा मोठा भाग वाऱ्याच्या जोरामुळे तुटून खाली पडला. हा पत्रा थेट बीआरटी मार्गात कोसळल्याने परिसरात काही काळ भीतीचे वातावरण निर्माण झाले.
घटनेच्या वेळी रस्त्यावर वाहनांची तसेच नागरिकांची वर्दळ होती. अचानक झालेल्या या प्रकारामुळे वाहनचालक आणि प्रवाशांमध्ये घबराट पसरली. काही काळ वाहतुकीवरही परिणाम झाला होता. मात्र, कोणतीही जीवितहानी अथवा गंभीर दुखापत न झाल्याने मोठा अनर्थ टळला.
या घटनेनंतर स्थानिक नागरिकांनी मेट्रो प्रशासनाच्या सुरक्षाविषयक उपाययोजनांवर प्रश्नचिन्ह उपस्थित केले आहे. वादळी वारे आणि अवकाळी पावसाच्या पार्श्वभूमीवर सुरू असलेल्या बांधकामांच्या ठिकाणी अधिक दक्षता घेण्याची मागणी नागरिकांकडून करण्यात येत आहे. तसेच अशा दुर्घटना टाळण्यासाठी बांधकाम साहित्याची मजबुती आणि सुरक्षा व्यवस्थेची तातडीने तपासणी करण्याची मागणीही होत आहे.
