भोसरी परिसरात गणेश विसर्जन मिरवणूक उत्साहात

शबनम न्यूज | प्रतिनिधी

भोसरी परिसरातील गणेश मंडळांच्या गणेशमूर्तींची विसर्जन मिरवणूक गुरुवार, दि. २४ सप्टेंबर रोजी उत्साहपूर्ण, भक्तिमय आणि शांततामय वातावरणात पार पडली. ढोल-ताशा, ढोल-लेझीम, पारंपरिक वाद्ये तसेच डीजेच्या गजरात गणरायाचा जयजयकार करत गणेशभक्त मोठ्या संख्येने या मिरवणुकीत सहभागी झाले होते.

पिंपरी-चिंचवड महानगरपालिकेच्या वतीने भोसरी येथील बापूजी बुवा चौकात गणेश विसर्जन मिरवणुकीतील मंडळांच्या स्वागतासाठी भव्य स्वागत कक्ष उभारण्यात आला होता. या ठिकाणी गणेश मंडळांच्या अध्यक्षांचा सहाय्यक अतुल पाटील, विशेष अधिकारी किरण गायकवाड आणि कार्यकारी अभियंता किरण अंदुरे यांच्या हस्ते सन्मान करण्यात आला.

भोसरी येथील स्वागत कक्षाच्या ठिकाणी पहिली गणेश विसर्जन मिरवणूक दुपारी दीड वाजेच्या सुमारास दाखल झाली. वीर हनुमान मित्र मंडळ, भोसरी गावठाण या मंडळाने विसर्जन मिरवणुकीला सुरुवात केली. त्यानंतर विविध गणेश मंडळांच्या मिरवणुका मार्गस्थ झाल्या. शेवटची गणेशमूर्ती विघ्नहर्ता मित्र मंडळ, विठ्ठल नगर, लांडेवाडीची गणेश विसर्जन मिरवणूक भोसरी येथील स्वागत कक्षाच्या ठिकाणाहून पुढे मार्गस्थ झाली.

या विसर्जन मिरवणुकीत वीर हनुमान मित्र मंडळ, लोंढे तालीम मित्र मंडळ, श्री कानिफनाथ मित्र मंडळ, नव महाराष्ट्र तरुण मंडळ, हिंदवी स्वराज्य तरुण मित्र मंडळ अँड ट्रस्ट, फुगे माने तालीम मंडळ, धर्मवीर संभाजी मित्र मंडळ, छत्रपती श्री शिवाजी तरुण मित्र मंडळ, कै. दामू शेठ गव्हाणे मित्र मंडळ, लांडगे लिंबाची तालीम मंडळ, नरवीर तानाजी मित्र मंडळ, पठारे लांडगे तालीम व्यायाम मंडळ, जय मल्हार मित्र मंडळ, खंडोबा मित्र मंडळ, मधले फुगे तालीम मंडळ, अष्टविनायक मित्र मंडळ, गव्हाणे तालीम मित्र मंडळ, भगवान गव्हाणे मित्र मंडळ, विनर्स मित्र मंडळ, नाथसाहेब प्रतिष्ठान, महात्मा फुले मित्र मंडळ, भोलेश्वर मित्र मंडळ, युवा सारथी मित्र मंडळ आणि विघ्नहर्ता मित्र मंडळ आदी गणेश मंडळांनी सहभाग घेतला.

मिरवणुकीदरम्यान विविध गणेश मंडळांनी सादर केलेले आकर्षक रथ, देखावे आणि पारंपरिक वाद्यवृंदांनी गणेशभक्तांचे लक्ष वेधून घेतले. छत्रपती श्री शिवाजी तरुण मंडळाच्या राम, सीता आणि लक्ष्मण यांच्या रथाने उपस्थितांचे विशेष लक्ष वेधले. पठारे लांडगे लिंबाची तालीम व्यायाम मंडळाचा विद्युत रोषणाईने सजवलेला रथही आकर्षणाचा केंद्रबिंदू ठरला. लांडेवाडी येथील नव महाराष्ट्र तरुण मंडळाने जगन्नाथ रथासह पारंपरिक केरळी कलाकारांच्या वाद्यवृंदासह काढलेल्या मिरवणुकीने उत्साहात भर घातली.

गणेश मंडळांचे स्वागत करण्यासाठी क्षेत्रीय अधिकारी अतुल पाटील, विशेष अधिकारी किरण गायकवाड, कार्यकारी अभियंता किरण अंदुरे यांच्यासह कार्यालयीन अधीक्षक शिवाजी खेडेकर, कार्यकारी अभियंता बाळू लांडे, उपअभियंता राजीव गाटुले, नीलेश केदार, कनिष्ठ अभियंता राधवेंद्र धर्मा कांबळे, मुख्य लिपिक धर्मा गंभीर, इस्माईल शेख, किशोर केदारी, प्रदीप गायकवाड, उमेश जगताप, जयश्री भागवत, राधिका पिंगळे, विद्या कवडे, भानुदास तापकीर आदी अधिकारी व कर्मचारी उपस्थित होते.

गणेश विसर्जनाच्या पार्श्वभूमीवर पिंपरी-चिंचवड महानगरपालिकेच्या वतीने आवश्यक नागरी सुविधा, स्वच्छता, निर्माल्य संकलन तसेच नागरिकांच्या सोयीसाठी आवश्यक व्यवस्था करण्यात आली होती. भोसरी पोलीस, वाहतूक शाखा, सीआरपीएफचे जवान तसेच संबंधित क्षेत्रीय कार्यालयातील अधिकारी व कर्मचाऱ्यांनी मिरवणूक सुरळीत आणि शांततेत पार पडण्यासाठी महत्त्वपूर्ण योगदान दिले.

गणेश मंडळांचे पदाधिकारी, कार्यकर्ते, स्वयंसेवक आणि नागरिकांच्या सहकार्यामुळे विसर्जन मिरवणूक शांततेत पार पडली. गणेश विसर्जन मिरवणुक स्वागत कक्षामध्ये सूत्रसंचालन किशोर केदारी यांनी केले.