शबनम न्यूज | प्रतिनिधी
राज्यातील बेकायदेशीर रेव्ह पार्ट्या, अमली पदार्थांची विक्री, गर्भलिंग निदान आणि पुण्यातील विषारी दारू प्रकरणातील संघटित गुन्हेगारी यासह विविध विषयांवर शिवसेना नेत्या व आमदार डॉ. नीलम गोऱ्हे यांनी बुधवारी पोलीस महासंचालक सदानंद दाते यांची मुंबईतील त्यांच्या कार्यालयात भेट घेऊन त्याबाबत तपशील सूचना व मुद्दे मांडले.
या भेटीदरम्यान डॉ. गोऱ्हे यांनी पुणे, पिंपरी-चिंचवड परिसरातील बेकायदेशीर रेव्ह पार्ट्या व मुंबईतील अमली पदार्थ विक्री, विषारी दारू प्रकरणातील गुन्हेगारी साखळी उघड करण्यासह राज्यातील गर्भलिंग निदान प्रकरणांमध्ये होत असलेल्या तपास व कायदेशीर प्रक्रियेच्या विलंबाकडे लक्ष वेधले. संबंधित यंत्रणांना तातडीने सूचना देऊन कारवाईला गती द्यावी, अशी मागणी डॉ. गोऱ्हे यांनी केली.
अवैध गर्भलिंग निदान करणाऱ्या संशयित ठिकाणी येणाऱ्या-जाणाऱ्या व्यक्ती व वाहनांवर सीसीटीव्ही यंत्रणेद्वारे प्रभावी नजर ठेवण्याची गरजही डॉ. गोऱ्हे यांनी व्यक्त केली. तसेच, कौटुंबिक हिंसाचार प्रकरणातील महिलांना तात्काळ न्याय व मानसिक आधार मिळावा यासाठी ‘भरोसा सेल’ आणि कौटुंबिक हिंसाचार संरक्षण अधिकारी यांनी समन्वयाने काम करावे अशी सूचना डॉ. गोऱ्हे यांनी केली होती. या सूचनांची प्रशासनाने दखल घेत परिपत्रक जारी केल्याची माहिती दाते यांच्याकडून देण्यात आली.
सर्व जिल्ह्यांतील दक्षता समित्यांमध्ये सदस्य नियुक्त करण्याबाबत डॉ. गोऱ्हे यांनी पूर्वी केलेल्या सूचनेचीही गंभीर दखल घेण्यात आली असून, लवकरच सर्व जिल्ह्यांत सदस्य नियुक्ती करण्याबाबतचे परिपत्रक काढले असल्याचे पोलीस महासंचालक सदानंद दाते यांनी स्पष्ट केले. या निर्णयाबद्दल डॉ. गोऱ्हे यांनी दाते यांचे आभार मानले.
डॉ. गोऱ्हे यांनी उपस्थित केलेल्या सर्व मुद्द्यांची तात्काळ दखल घेत पोलीस महासंचालक श्री. सदानंद दाते यांनी संबंधित अधिकाऱ्यांना दूरध्वनीवरून सूचना दिल्या. तसेच, या प्रकरणांवर संबंधित पोलीस महानिरीक्षकांसोबतच्या नियमित बैठकीत हे विषय घेऊन कार्यवाही करणार असल्याचे त्यांनी सांगितले.
