शबनम न्यूज | प्रतिनिधी
पिंपरी-चिंचवड शहराच्या वाढत्या लोकसंख्येला आणि विस्ताराला अनुरूप अशी अत्याधुनिक सुविधा उपलब्ध करून देण्यासाठी उभारण्यात येत असलेल्या नवीन भव्य प्रशासकीय इमारतीची आज पिंपरी चिंचवड महानगरपालिकेचे विरोधी पक्षनेते भाऊसाहेब भोईर यांनी सविस्तर पाहणी केली.
या पाहणीदरम्यान त्यांनी इमारतीच्या विविध मजल्यांवरील सुरू असलेल्या बांधकामांची, संरचनात्मक कामांची तसेच अंतर्गत सुविधा उभारणीची माहिती अधिकाऱ्यांकडून घेतली. कामाचा दर्जा, वापरण्यात येणारे साहित्य, सुरक्षिततेची उपाययोजना आणि नियोजित वेळापत्रक याबाबत त्यांनी सखोल चर्चा केली.
शहराचा वेगाने वाढणारा विस्तार लक्षात घेता नागरिकांना विविध विभागांसाठी वेगवेगळ्या ठिकाणी धावपळ करावी लागू नये, यासाठी सर्व नागरी सेवा एकाच छताखाली उपलब्ध व्हाव्यात, हा या इमारतीमागील प्रमुख उद्देश असल्याचे भोईर यांनी सांगितले. अत्याधुनिक तंत्रज्ञान, डिजिटल सेवा, सुसज्ज सभागृहे, प्रशस्त प्रतीक्षागृहे आणि दिव्यांगांसाठी सुलभ प्रवेश यांसारख्या सुविधा या इमारतीत असतील, अशी माहितीही त्यांनी दिली.
काम वेळेत पूर्ण व्हावे आणि गुणवत्तेत कोणतीही तडजोड होऊ नये, यासाठी संबंधित अधिकाऱ्यांना स्पष्ट सूचना देण्यात आल्या. ठरलेल्या मुदतीत प्रकल्प पूर्ण करून नागरिकांच्या सेवेत लवकरात लवकर दाखल करण्याबाबत त्यांनी आग्रही भूमिका घेतली.
शहराच्या वैभवात भर
ही नवीन प्रशासकीय इमारत केवळ कार्यालयीन कामकाजापुरती मर्यादित नसून शहराच्या विकासाचे प्रतीक ठरेल, असा विश्वास भाऊसाहेब भोईर यांनी व्यक्त केला. आधुनिक रचना आणि सुविधा यामुळे पिंपरी-चिंचवड शहराच्या वैभवात निश्चितच भर पडेल, असे त्यांनी नमूद केले.
पाहणीवेळी मनपा अधिकारी व अभियंते उपस्थित होते.
