शबनम न्यूज | प्रतिनिधी
महाराष्ट्र राज्य परीक्षा परिषदेमार्फत डी.एल.एड्. डिसेंबर २०२५ परीक्षेचे आयोजन ९ ते १७ डिसेंबर २०२५ या कालावधीत करण्यात आले होते. या परीक्षेचा निकाल परिषदेच्या संकेतस्थळावर जाहीर करण्यात आला असून यामध्ये एकूण ७४.२२ टक्के विद्यार्थी उत्तीर्ण झाल्याचे परीक्षा परिषदेमार्फत कळविण्यात आले आहे.
डी.एल.एड्. (शिक्षण अध्यापन पदविका परीक्षा) परीक्षेच्या द्वितीय वर्षाच्या परीक्षेत सर्व माध्यमांचे एकूण ३६०० विद्यार्थ्यांनी नोंदणी केली होती. यापैकी ३५६८ विद्यार्थ्यांनी परीक्षा दिली. तर २६७२ विद्यार्थी उत्तीर्ण झाले. या निकालात मराठी माध्यमामधील ७२.८३, उर्दूमधील ८०.०७, हिंदीमधील ८९.१९ तर इंग्रजी मधील उत्तीर्ण विद्यार्थ्यांचे प्रमाण ७३.८७ इतके आहे.
विद्यार्थ्यांना निकालाचे मूळ गुणपत्रक संबंधित अध्यापक विद्यालयामार्फत यथावकाश हस्तपोच मिळेल. तसेच उत्तरपत्रिकेची गुणपडताळणी व उत्तरपत्रिकेची छायाप्रत मागणीसाठी विहीत नमून्यात, विहीत शुल्कासह २० फेब्रुवारी २०२६ पर्यंत अर्ज करता येतील, असे परीक्षा परिषदेच्या आयुक्त अनुराधा ओक यांनी कळविले आहे.
