शबनम न्यूज | प्रतिनिधी
चिखली परिसरात सुरू असलेल्या बांधकामात ठेकेदाराच्या दुर्लक्षामुळे १८ वर्षीय मजुराचा दुर्दैवी मृत्यू झाल्याची घटना उघडकीस आली आहे. दि. १ सप्टेंबर रोजी सकाळी साडेआठच्या सुमारास रॉयल हेरिटेज, एका स्कूलजवळ ही घटना घडली.
फिर्यादी गोबिंदा शंभु सिंगा (वय २२, रा. चिखली) यांनी दिलेल्या तक्रारीनुसार, ठेकेदार भरत विठ्ठल चव्हाण (वय ३२, रा. प्राधिकरण, चिखली) यांनी कामगारांना सुरक्षिततेची साधने जसे की हेल्मेट व सेफ्टी बेल्ट न देता १४व्या मजल्यावर सेट्रींगचे काम करण्यास भाग पाडले.
दरम्यान, फिर्यादीचा चुलत भाऊ दयाल रजित सिंग (वय १८, मूळ रा. बक्सा जिल्हा, आसाम) सेट्रींगचे काम करत असताना तोल जाऊन खाली पडला. या अपघातात त्याच्या डोक्याला, हातांना व चेहऱ्यावर गंभीर दुखापत होऊन त्याचा जागीच मृत्यू झाला. या प्रकरणी चिखली पोलिसांनी ठेकेदार भरत विठ्ठल चव्हाण याच्याविरुद्ध भारतीय दंड संहिता कलम अंतर्गत गुन्हा दाखल केला असून आरोपी अद्याप अटकेत नाही. या घटनेमुळे बांधकामातील सुरक्षिततेबाबत पुन्हा एकदा गंभीर प्रश्न निर्माण झाले आहेत.
