शबनम न्यूज | प्रतिनिधी
आंध्र प्रदेश राज्यातील विविध महापालिका व संस्थांचे वरिष्ठ अधिकाऱ्यांचे शिष्टमंडळ पिंपरी चिंचवड महापालिकेच्या कचरा व्यवस्थापन प्रकल्पांचा अभ्यास करण्यासाठी विशेष दौऱ्यावर आले होते. त्यांनी शहरातील विविध प्रकल्पांची पाहणी करताना पिंपरी चिंचवड महापालिकेच्या पर्यावरणपूरक धोरणांबद्दल समाधान व्यक्त केले.
शिष्टमंडळात तडीपात्री महापालिकेचे आयुक्त एस. शिव रामकृष्णा, विशाखापट्टणम महापालिकेचे मुख्य वैद्यकीय अधिकारी डॉ. ई. एन. व्ही. नरेशकुमार, कार्यकारी अभियंता के. गुरप्पा यादव, कार्यकारी अभियंता एम. नारायण स्वामी, तांत्रिक तज्ज्ञ श्रीनिवास रेड्डी, वरिष्ठ प्रकल्प सहकारी (सीडीएमए) एम. डी. जावेद आणि प्रकल्प सहकारी (स्वच्छ आंध्र कॉर्पोरेशन) एस. डी. रहतुल्लाह यांचा समावेश होता. यासर्वांना आयुक्त तथा प्रशासक शेखर सिंह, अतिरिक्त आयुक्त विजयकुमार खोराटे, मुख्य अभियंता संजय कुलकर्णी, उपायुक्त सचिन पवार यांच्या मार्गदर्शनाखाली कार्यकारी अभियंता हरविंदरसिंग बन्सल, ह क्षेत्रीय कार्यालय सहाय्यक आरोग्य अधिकारी अंकुश झिटे, कनिष्ठ अभियंता दशरथ वाघोले आणि कनिष्ठ अभियंता स्वालीहा मुल्ला यांनी विविध प्रकल्पांची माहिती दिली.
आंध्र प्रदेश राज्यातील शिष्टमंडळाने शहरातील आरोग्य विभाग व पर्यावरण विभाग यांच्या अधिपत्याखाली चालू असलेले दारोदारी कचरा संकलन व वर्गीकरण प्रक्रिया, दापोडी येथील शून्य कचरा प्रकल्प, कचरा ट्रान्स्फर स्टेशन, मोशी येथील बांधकाम राडारोडा प्रक्रिया प्रकल्प, बायो मिथीलेशन प्रकल्प आदी महत्त्वपूर्ण उपक्रमांचा आढावा घेत प्रत्यक्ष पाहणी दौरा केला.
शहरातील निवासी संकुले, औद्योगिक क्षेत्रे, व्यावसायिक आस्थापना, रुग्णालये, भाजीबाजार यांसारख्या विविध स्त्रोतांमधून निर्माण होणारा घरगुती कचरा, प्लास्टिक, पालापाचोळा, उरलेले अन्न, जैविक व अजैविक कचरा, ई-कचरा तसेच जैववैद्यकीय कचऱ्याची शास्त्रोक्त पद्धतीने विल्हेवाट लावण्याचे काम महापालिकेकडून केले जाते, या संपूर्ण प्रक्रियेची माहिती शिष्टमंडळाने जाणून घेतली.
या शिष्टमंडळाने दापोडी शून्य कचरा प्रकल्पाला भेट देऊन संपूर्ण प्रक्रिया प्रत्यक्ष पाहिली. या प्रकल्पात स्थानिक महिलांच्या सहभागातून दररोज ४०० हून अधिक घरांचा कचरा गोळा केला जातो. ओला कचरा खतामध्ये रूपांतरित केला जातो, तर सुका कचरा विविध मशीनद्वारे पुनर्वापरयोग्य पदार्थांमध्ये बदलला जातो. तसेच सॅनिटरी वेस्ट इनसिनिरेटरद्वारे सुरक्षित विल्हेवाट लावली जाते, याची सविस्तर माहिती शिष्टमंडळाने घेतली.
याशिवाय मोशी येथील २०० टीपीडी क्षमतेचा बांधकाम राडारोडा प्रक्रिया प्रकल्प कार्यान्वित करण्यात आला आहे. या प्रकल्पाला भेट देत शिष्टमंडळाने येथील कामकाज नेमके कसे चालते, हे जाणून घेतले. तसेच कासारवाडी, गवळीमाथा आणि काळेवाडी येथील प्रत्येकी २०० मेट्रिक टन क्षमतेची केंद्रे सध्या यशस्वीरित्या सुरू असून, आंध्र प्रदेशच्या शिष्टमंडळाने या केंद्रांची पाहणी केली. मोशी येथील हॉटेल वेस्ट टू बायोगॅस (बायो मिथीलेशन) प्रकल्पाद्वारे शहरातील सर्व हॉटेल्स, खानावळी, मंगल कार्यालयांतून निर्माण होणारा ओला कचरा विशेष जीपीएस यंत्रणेसह सज्ज वाहनांमार्फत गोळा करून त्याचे विलगीकरण व पोच करण्याच्या प्रक्रियेबाबत शिष्टमंडळाला सविस्तर माहिती देण्यात आली.
पिंपरी चिंचवड महापालिकेने घनकचरा व्यवस्थापन क्षेत्रात शाश्वत व नाविन्यपूर्ण उपाययोजना राबविल्या आहेत. शहरातील प्रत्येक नागरिकाला स्वच्छतेची सुविधा उपलब्ध करून देणे हे आमचे प्रमुख ध्येय आहे. नागरिकांचा सहभाग, अत्याधुनिक तंत्रज्ञानाचा वापर व काटेकोर नियोजन यांच्या जोरावर आज महापालिकेने घनकचरा व्यवस्थापनात एक आदर्श उभा केला आहे.
– शेखर सिंह, आयुक्त तथा प्रशासक, पिंपरी चिंचवड महापालिका
मोशी येथे उभारण्यात आलेला कचरा प्रक्रिया प्रकल्प, तसेच शहरात उभारलेली ट्रान्स्फर सेंटर्स ही स्वच्छतेच्या दृष्टीने महत्त्वपूर्ण पावले आहेत. कचरा संकलन, वर्गीकरण आणि त्याचे वैज्ञानिक व्यवस्थापन करण्यासाठी वेगवेगळे प्रकल्प उभारण्यास पिंपरी चिंचवड महापालिकेचा प्रयत्न असतो. हे प्रकल्प पाहण्यासाठी विविध राज्यांतून शिष्टमंडळे येतात. यावरून या प्रकल्पाचे यश सिद्ध होते.
– विजयकुमार खोराटे, अतिरिक्त आयुक्त, पिंपरी चिंचवड महापालिका
पिंपरी चिंचवड महापालिका ज्या पद्धतीने कचऱ्याचे विभाजन आणि सर्व प्रकल्पांची देखभाल करत आहे, तो इतर शहरांसाठी एक आदर्श आहे. तसेच महापालिकेची धोरणे ही खऱ्या अर्थाने पर्यावरणपूरक असून, ही धोरणे विशाखापट्टणम महापालिकेतही राबविण्याचा आमचा मानस आहे.
– डॉ. ई. एन. व्ही. नरेशकुमार, मुख्य वैद्यकीय अधिकारी ,विशाखापट्टणम महापालिका
