पिंपरी, ८ ऑगस्ट २०२५ :* पिंपरी चिंचवड शहरातील भोसरी एमआयडीसी पोलिस स्टेशनजवळ आज अचानक एक मोठे झाड रस्त्यावर कोसळण्याचा प्रकार घडला. या घटनेमुळे वाहतुकीस अडथळा निर्माण झाला होता. या झाडाखाली एक दुचाकी व एक सायकल अडकून पडली होती. पोलिस कर्मचारी विठ्ठल तरंगे यांनी याबाबत महापालिकेच्या अग्निशमन विभागाला माहिती दिली. त्यास तात्काळ प्रतिसाद देत मुळशी उपअग्निशमन केंद्राचे पथक घटनास्थळी दाखल झाले.
रस्त्यावर झाड पडल्यामुळे अडथळा निर्माण होऊन रस्त्याच्या दोन्ही बाजूंची वाहतूक बंद झाली होती. अशा परिस्थितीत तात्काळ अग्निशमन दलाच्या जवानांनी पडलेले झाड बाजूला करून त्याखाली अडकलेली वाहने सुरक्षितपणे बाहेर काढली आणि रस्ता वाहतुकीसाठी खुला करण्यात आला. ही संपूर्ण कारवाई अत्यंत तत्परतेने पार पाडण्यात आल्याने नागरिकांनी अग्निशमन विभागाच्या कार्यक्षमतेचे आणि तत्परतेचे कौतुक केले आहे.
दरम्यान, अशा प्रकारच्या आपत्कालीन परिस्थितीमध्ये नागरिकांनी १०१ (अग्निशमन विभाग) किंवा १०८ (आपत्कालीन मदत क्रमांक) या क्रमांकांवर संपर्क साधावा, असे आवाहन अग्निशमन विभागामार्फत करण्यात आले आहे.
