प्रभाग १८ मधून ज्योतीताई निंबाळकर यांनाच निवडून आणण्याचा महिलांचा निर्धार

राष्ट्रवादी काँग्रेस उमेदवाराच्या प्रचाराला महिला भगिनींचा उत्स्फूर्त प्रतिसाद

शबनम न्यूज | प्रतिनिधी

पिंपरी-चिंचवड महानगरपालिका निवडणुकीच्या पार्श्वभूमीवर प्रभाग क्रमांक १८ मधून राष्ट्रवादी काँग्रेसच्या अधिकृत उमेदवार ज्योतीताई निंबाळकर यांच्या प्रचाराला मोठ्या प्रमाणात गती मिळत आहे. विशेष म्हणजे, या निवडणुकीत ज्योतीताई निंबाळकर यांनाच प्रतिनिधित्व करण्याची संधी देण्याचा ठाम निर्धार महिला भगिनींनी केला असून त्यांच्या प्रचारात महिलांचा उत्स्फूर्त सहभाग पाहावयास मिळत आहे.

प्रचारादरम्यान विविध भागांमध्ये महिलांनी ज्योतीताई निंबाळकर यांचे औक्षण करून स्वागत केले. अनेक ठिकाणी महिलांनी आपल्या परिसरातील समस्या, अडचणी आणि अपेक्षा थेट त्यांच्यासमोर मांडल्या. पाणीपुरवठा, स्वच्छता, आरोग्य सुविधा, महिलांची सुरक्षितता, अंगणवाडी, शाळा तसेच रोजगाराच्या संधी या विषयांवर महिलांनी विशेष चर्चा केली. या सर्व प्रश्नांवर प्राधान्याने उपाययोजना करण्याचे आश्वासन ज्योतीताई निंबाळकर यांनी दिले.

ज्योतीताई निंबाळकर या सामाजिक कार्यातून पुढे आलेल्या असून महिलांच्या प्रश्नांची त्यांना सखोल जाण आहे. यापूर्वीही त्यांनी विविध सामाजिक उपक्रमांतून महिलांसाठी काम केले आहे. बचत गटांना प्रोत्साहन, आरोग्य तपासणी शिबिरे, महिलांसाठी जनजागृती कार्यक्रम, तसेच गरजू महिलांना शासकीय योजनांचा लाभ मिळवून देण्यासाठी त्यांनी केलेले प्रयत्न महिलांमध्ये विशेष विश्वास निर्माण करणारे ठरले आहेत.

या निवडणुकीत प्रभाग क्रमांक १८ मध्ये महिलाच प्रचाराची धुरा सांभाळताना दिसत आहेत. पदयात्रा, घरोघरी भेटी, बैठका आणि संवाद कार्यक्रमांमध्ये महिलांची मोठी उपस्थिती दिसून येत आहे. महिला भगिनी स्वतः पुढाकार घेऊन ज्योतीताई निंबाळकर यांचा प्रचार करत असून, “आमच्यासाठी आमच्यातलीच प्रतिनिधी हवी,” अशी भावना व्यक्त करत आहेत.

राष्ट्रवादी काँग्रेसच्या ‘घड्याळ’ या निवडणूक चिन्हावर मतदान करून महिलांनी आपली ताकद दाखवावी, असे आवाहन ज्योतीताई निंबाळकर यांनी केले आहे. “महिला सशक्तीकरण, सुरक्षितता आणि प्रभागाचा सर्वांगीण विकास हेच माझे प्रमुख उद्दिष्ट आहे,” असे त्यांनी सांगितले.

महिलांचा वाढता पाठिंबा पाहता प्रभाग क्रमांक १८ मधील निवडणूक लढतीत ज्योतीताई निंबाळकर यांना निर्णायक फायदा होण्याची शक्यता व्यक्त केली जात आहे. महिला मतदारांची एकजूट आणि सक्रिय सहभागामुळे प्रभागातील राजकीय वातावरण बदलत असल्याचे स्पष्टपणे दिसून येत आहे.