मराठा सेवा संघाच्या वतीने ३ ते १४ जानेवारीदरम्यान विविध कार्यक्रम
शबनम न्यूज | प्रतिनिधी
मराठा सेवा संघाच्या वतीने सावीत्रीबाई फुले, राजमाता जिजाऊ आणि संत चोखामेळा महाराज यांच्या जयंतीनिमित्त भव्य जनजागृती व समाज प्रबोधन सोहळ्याचे आयोजन करण्यात आले आहे. हा कार्यक्रम ३ ते १४ जानेवारी २०२६ या कालावधीत विविध ठिकाणी संपन्न होणार असून, सामाजिक, शैक्षणिक, सांस्कृतिक आणि वैचारिक कार्यक्रमांची रेलचेल असणार आहे.
या कार्यक्रमांतर्गत सावित्री–जिजाऊ दशरात्रोत्सव, जिजाऊ जन्मोत्सव, व्याख्याने, सांस्कृतिक कार्यक्रम, मिरवणूक, पुरस्कार वितरण तसेच समाज प्रबोधनात्मक उपक्रम राबविण्यात येणार आहेत. या सोहळ्याचा मुख्य उद्देश समाजात वैचारिक जागृती घडवून आणणे, स्त्री-शिक्षण, सामाजिक समता, न्याय आणि राष्ट्रनिर्मितीचे विचार पुढे नेणे हा आहे.
या उपक्रमाची सुरुवात ३ जानेवारी २०२६ रोजी सावीत्री–जिजाऊ दशरात्रोत्सवाच्या उद्घाटनाने होणार आहे. दशरात्रोत्सवांतर्गत दररोज विविध सांस्कृतिक कार्यक्रम, व्याख्याने, परिसंवाद आणि समाजप्रबोधनात्मक सादरीकरण होणार आहेत. या कार्यक्रमांमध्ये महाराष्ट्रातील नामवंत वक्ते, अभ्यासक, सामाजिक कार्यकर्ते आणि मान्यवर उपस्थित राहणार आहेत.
१३ जानेवारी २०२६ रोजी राजमाता जिजाऊ यांचा जन्मोत्सव मोठ्या उत्साहात साजरा करण्यात येणार असून, यानिमित्त व्याख्याने, सांस्कृतिक कार्यक्रम, तसेच मातृशक्ती व राष्ट्रनिर्मितीवर आधारित विचारमंथन होणार आहे. राजमाता जिजाऊ यांच्या राष्ट्रघडणीतील योगदानावर प्रकाश टाकण्यात येणार आहे.
१४ जानेवारी २०२६ रोजी संत चोखामेळा महाराज जयंतीनिमित्त समाज प्रबोधन कार्यक्रम आयोजित करण्यात आला आहे. संत चोखामेळा महाराजांच्या समता, बंधुता आणि मानवतेच्या विचारांचा प्रसार करण्यावर या कार्यक्रमात भर दिला जाणार आहे.
या कालावधीत मराठा सेवा संघाच्या वतीने विविध सामाजिक, शैक्षणिक व सांस्कृतिक क्षेत्रात उल्लेखनीय कार्य करणाऱ्या व्यक्तींना पुरस्कार देऊन गौरवण्यात येणार आहे. या पुरस्कार वितरण सोहळ्यामुळे समाजातील प्रेरणादायी व्यक्तींचा सन्मान होणार असल्याचे आयोजकांनी सांगितले.
मराठा सेवा संघाच्या पदाधिकाऱ्यांनी या सर्व कार्यक्रमांना समाजातील सर्व घटकांनी, युवक, महिला, विद्यार्थी आणि ज्येष्ठ नागरिकांनी मोठ्या संख्येने उपस्थित राहावे, असे आवाहन केले आहे. “ही केवळ जयंती नव्हे तर समाजाच्या वैचारिक उन्नतीसाठी चाललेली चळवळ आहे,” असे आयोजकांनी सांगितले.
या जनजागृती व समाज प्रबोधन सोहळ्यामुळे सामाजिक सलोखा, शिक्षणाची जाणीव आणि परिवर्तनशील विचार समाजात रुजतील, असा विश्वास व्यक्त करण्यात येत आहे.
