शबनम न्यूज | प्रतिनिधी
पिंपरी–चिंचवड महानगरपालिका सार्वत्रिक निवडणुकीच्या पार्श्वभूमीवर प्रभाग क्रमांक १४ अ मधील राजकीय हालचालींना वेग आला असून, OBC पुरुष गटातून निखिल दळवी यांनी आज अधिकृतपणे आपला नामनिर्देशक उमेदवारी अर्ज दाखल केला. हा अर्ज त्यांनी हेगडेवार भवन येथील निवडणूक विभाग कार्यालयात सादर केला.
उमेदवारी अर्ज दाखल करताना कार्यकर्ते, समर्थक, सामाजिक कार्यकर्ते तसेच परिसरातील नागरिक मोठ्या संख्येने उपस्थित होते. यावेळी “विकास, पारदर्शकता आणि लोकसहभाग” या त्रिसूत्रीवर आधारित काम करण्याचा निर्धार निखिल दळवी यांनी व्यक्त केला.
प्रभागातील मूलभूत सुविधा – रस्ते, पाणीपुरवठा, ड्रेनेज व्यवस्था, स्वच्छता, आरोग्य सुविधा, शिक्षण, युवकांसाठी क्रीडा सुविधा तसेच महिलांच्या सुरक्षिततेसाठी ठोस उपाययोजना राबवण्यावर आपला भर राहील, असे त्यांनी सांगितले. तसेच झोपडपट्टी पुनर्वसन, गरीब व मध्यमवर्गीय घटकांसाठी योजना प्रभावीपणे राबवणे, ज्येष्ठ नागरिकांसाठी सुविधा केंद्र उभारणे आणि डिजिटल सेवा अधिक सुलभ करण्याचा संकल्पही त्यांनी यावेळी मांडला.
स्थानिक प्रश्नांची जाण असलेला, तरुण आणि सक्रिय चेहरा म्हणून निखिल दळवी यांची ओळख असून, सामाजिक कार्यातून त्यांनी नागरिकांशी सतत संपर्क ठेवला आहे. त्यामुळे त्यांच्या उमेदवारीला प्रभागात सकारात्मक प्रतिसाद मिळत असल्याचे चित्र आहे.
निवडणूक प्रक्रियेला सुरुवात होत असताना प्रभाग क्रमांक १४ अ मध्ये आता राजकीय वातावरण तापू लागले असून, येत्या काळात प्रचाराला अधिक वेग येण्याची शक्यता व्यक्त केली जात आहे.
