शबनम न्यूज | प्रतिनिधी
पीएमपी बसची वाट पाहत थांबलेल्या शाळकरी मुलावर किरकोळ वादातून शस्त्राने वार करण्यात आल्याची घटना महर्षीनगर भागात घडली. मुलाच्या हाताला दुखापत झाली असून, पसार झालेल्या आरोपींचा शोध घेण्यात येत आहे.या घटनेत १४ वर्षीय मुलगा किरकोळ जखमी झाला आहे. त्याने दिलेल्या फिर्यादीनुसार, स्वारगेट पोलीस ठाण्यात आरोपीविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, तक्रारदार १४ वर्षीय मुलगा कोंढव्यातील बधेनगर भागात राहायला आहे. तो सोमवारी (१ डिसेंबर) सायंकाळी पावणेपाचच्या सुमारास घरी निघाला होता. महर्षीनगर भागातील पुजारी उद्यानाजवळ असलेल्या पीएमपी थांब्यावर तो थांबला होता. त्यावेळी तेथे एक जण आला.त्याने मुलाकडे रागाने बघितले आणि अचानक त्याच्याकडे असलेल्या शस्त्राने मुलाच्या हातावर वार केला. मुलाने आरडाओरडा के्ल्यानंतर आरोपी दोन साथीदारांसाेबत तेथून पसार झाला. या घटनेची माहिती मिळताच वरिष्ठ पोलीस निरीक्षक यशवंत निकम, गुन्हे शाखेचे निरीक्षक विकास भारमळ यांनी घटनास्थळी भेट दिली.
पसार झालेल्या आरोपींचा शोध घेण्यात येत असून, पोलीस उपनिरीक्षक बी. पी. शिरसट तपास करत आहेत. गेल्या वर्षी शाळेत झालेल्या वादातून एका मुलावर तीक्ष्ण शस्त्राने वार करण्यात आल्याची घटना भवानी पेठेतील एका शाळेसमोर घडली होती. खुनाचा प्रयत्न केल्याप्रकरणी शाळेतील मुलांना खडक पोलिसांनी ताब्यात घेतले होते.
